Personi që po shfaqet në të djathtën e kryeshefit të “Ibër Lepencit”, Faruk Mujkës, është Bajram Mustafa, emri i të cilit është lakuar më së shumti në aferën e Whatsappit të publikuar nga VOX Kosova.
Mustafa, është Kryesues i Bordit të Drejtorëve në Ndërmarrjen Hidroekonomike “Ibër – Lepenc”, ku Faruk Mujka është kryeshef ekzekutiv.
Mustafa, ishte emëruar më 30 prill 2022 nga Albin Kurti në këtë pozitë, në kundërshtim të plotë me rekomandimet e Ambasadës Britanike, e cila atë e poziciononte të 10-tin në Listë të propozimeve.
Por Mujka kishte tjetër ide për Mustafën. Besonte, se aty është caktuar nga presidentja Vjosa Osmani për t’i çuar përpara interesat e saja dhe për ta emëruar kryeshefe Kaltrina Demirin, një zyrtare të partisë “Guxo”.
Në një rast tjetër, Ministrja Rizvanolli dhe Faruk Mujka lëshohen në ofendime ndaj Mustafës. Këtë të fundit, e krahasojnë me Skender Hysenin e LDK-së, e të dyve u referohen me termin “minuk”.
Në një bisedë me VOX Kosova, Mustafa, pas disa insistimesh, mohon të jetë caktuar në pozitë nga Vjosa Osmani.
Thotë, se s’mund t’i bëjë askush presion për pozitën e kryeshefit.
Por, Mustafa ishte pikërisht ai që e kishte nënshkruar vendimin për caktimin kryeshef të Faruk Mujkës.
