Sipas ish-deputetit të Partisë Demokratike të Kosovës, Xhavit Halitit, kryetari i zgjedhur i Kuvendit të Kosovës, Dimal Basha duhet të jap dorëheqje nga kjo pozitë. Në një intervistë për VOX Kosova, Haliti thotë se Basha duhet të tregojë “nga kush u pagua”.
“Unë mendoj që ndërgjegjja e tij në raport me të pavërtetat që ka thënë do të duhej me sqaru publikisht situatën që e ka pas a ka pas përfitim a ajo? Kush e ka pagu? Dhe mendoj që do të duhej të jep dorëheqje. Dhe unë mendoj që kjo legjislaturë nuk do të duhej të funksiononte duke qenë ai kryetar i Parlamentit”, tha Haliti.
Basha, në një punim në bashkëautorësi shkruante se Ushtria Çlirimtare e Kosovës (UÇK), bashkëpunoi me kriminelë brenda dhe jashtë Kosovës.
“Ka pasur akuza të shumta nga agjencitë perëndimore të zbatimit të ligjit se Ushtria Çlirimtare e Kosovës (UÇK), gjatë ngritjes së saj, bashkëpunoi me kriminelë shqiptarë etnikë brenda dhe jashtë Kosovës”, shkruante Basha në këtë punim, të realizuar bashkë me maqedonasen Jana Arsovska.
Basha shkruante se “fondet për UÇK-në vinin nga shqiptarë të zakonshëm në diasporë, si dhe nga trafikantë droge që vepronin në të gjithë Evropën Perëndimore dhe SHBA-në”.
“Kjo mbështetje nuk kufizohej vetëm në para, por trafikantët e drogës dërgonin gjithashtu njerëz të armatosur për të luftuar përkrah UÇK-së dhe blinin armë në emër të UÇK-së”, shkruante ai.
