Faton Peci, kryetar i Komunës së Mitrovicës, ka emëruar në pozitën e drejtores për Bujqësi dhe Zhvillim Rajonal, Remzie Tmava-Tupellën, e cila është motra e prokurorit, Sahit Tmava, që hetonte rastin e keqpërdorimit me vota në Mitrovicë.
Gjatë verifikimit të votave në balotazhin e zgjedhjeve lokale në Mitrovicë ishin gjetur fletëvotime me numra serikë që nuk i përkisnin klasave dhe shkollave ku ato ishin të vendosura.
Prokuroria kishte urdhëruar ndërprerjen e numërimit, deri kur prokurori i rastit u ndërrua. Rastin e mori në dorë prokurori Tmava, i cili urdhëroi rifillimin e numërimit.
Dje, më 16 janar, Peci emëroi për nënkryetar të Komunës, Enis Osmanin, këshilltarin e tij politik që ishte dënuar për vjedhje votash në vitin 2017.
Veç Osmanit, Peci në kabinetin e tij ka edhe një tjetër person që ka pasur probleme me ligjin. Drejtori i tij për Punë dhe Mirëqenie Sociale, Ramadan Beshiri, sipas aktgjykimit që ka siguruar VOX Kosova, ishte dënuar për drogë. Atij i ishin shqiptuar 6 muaj burgim dhe 600 euro gjobë për “posedim të paautorizuar të narkotikëve, substancave psikotrope ose analoge”.
Faton Peci fitoi zgjedhjet për Kryetar të Mitrovicës dhe la pozitën e Ministrit të Bujqësisë në Qeverinë e Albin Kurtit. Gjatë punës së tij si ministër, Peci është apostrofuar shpesh për shkelje të ligjit, skandale korruptive e emërime me nepotizëm.
