“Prokurori i çështjes gjendet në pushim vjetor”, kanë thënë nga Prokuroria Themelore e Prishtinës, pasi janë pyetur se çfarë ka ndodhur me kallëzimin penal që deputetja e Lëvizjes Vetëvendosje, Mimoza Kusari-Lila, e ka bërë ndaj deputetit të Listës Serbe, Slavko Simiç, për incizim të paautorizuar, si dhe ndaj mediumit “Nacionale” për falsifikim të përmbajtjes së këtyre incizimeve.
“Për çështjen në fjalë do të ju informojmë me kohë sapo të kemi përgjigjen përkatëse”, kanë deklaruar nga Prokuroria për VOX Kosova.
Kusari-Lila kishte dorëzuar kallëzimin penal dy vjet më parë, pas publikimit të disa audio-incizimeve nga mediumi Nacionale, në qershor të vitit 2023.
Në to, ajo dëgjohej duke folur në emër të Qeverisë, për takime dhe koordinime me Listën Serbe dhe me kryekriminelin, Milan Radojiçiç, për çështje politike si emërimi i një gjyqtari në Gjykatën Kushtetuese dhe listat e veteranëve të UÇK-së.
Deputetja Kusari-Lila deklaroi për VOX Kosova se nuk ka njohuri për ecurinë e këtij rasti.
“Duhet me e pyet Prokurorinë… Nuk e di a kanë vazhduar hetimet. Pyetjet duhet të adresohen në Prokurori. Ata nuk më kanë informuar më tutje për procedurat tjera. Aktualisht nuk kam njohuri për rastin”, ka pohuar ajo.
