“Aktualisht nuk kam njohuri për rastin”, ka thënë deputetja e Lëvizjes Vetëvendosje, Mimoza Kusari-Lila, dy vjet pasi që dorëzoi kallëzim penal ndaj deputetit të Listës Serbe, Slavko Simiç, për incizim të paautorizuar dhe ndaj mediumit Nacionale për falsifikim të përmbajtjes së këtyre incizimeve.
“Duhet me e pyet Prokurorinë… Nuk e di a kanë vazhduar hetimet. Pyetjet duhet të adresohen në Prokurori. Ata nuk më kanë informuar më tutje për procedurat tjera. Aktualisht nuk kam njohuri për rastin”, deklaroi Kusari-Lila për VOX Kosova.
Mediumi Nacionale kishte publikuar në qershor 2023 disa audio-incizime ku dëgjohej deputetja e partisë në pushtet Kusari-Lila, duke folur në emër të Qeverisë së Kosovës për takime dhe koordinime me Listën Serbe dhe me kryekriminelin, Milan Radojiçiç, për disa çështje politike, si emërimi i një gjyqtari të Gjykatës Kushtetuese e listat e veteranëve të Ushtrisë Çlirimtare të Kosovës.
