Në një skenë që më shumë ngjante me një tubim fushate parazgjedhore sesa me një ceremoni zyrtare, në përurimin e një çerdhe në Bardhosh, kryeministri në detyrë Albin Kurti nuk kurseu “thumbat” ndaj kryetarit të Prishtinës, Përparim Rama, duke e paralajmëruar që nuk do të jetë më i pari i kryeqytetit.
“Rama pas vjeshtës duhet të gjej një punë tjetër”, tha Kurti duke e shpallur joformalisht fundin e mandatit të kryetarit aktual të Prishtinës, derisa partia e Kurtit – Lëvizja Vetëvendosje synon që ta fitoi garën për kryeqytetin përmes kandidatit të saj Hajrulla Çekut në zgjedhjet lokale që do të mbahen më 12 tetor.
Ky “kunj” i Kurtit ndaj Ramës erdhi si përgjigje ndaj thirrjes publike që ky i fundit i bëri kryeministrit në detyrë për të zhbllokuar buxhetin e Komunës, duke përmendur projekte madhore që kanë mbetur pezull për shkak të, siç tha ai, mungesës së bashkëpunimit nga niveli qendror.
“Kemi edhe një numër të madh të projekteve në kryeqytet që unë kisha dashur me ju lut kryeministrit në detyrë publikisht që të zhbllokojë buxhetin e kryeqytetit, i cili tashmë është i bllokuar. Projekte të mëdha si unaza e kryeqytetit që është në vlerë prej 206 milionë. Janë projekte për kryeqytetin”, theksoi Rama.
Përparim Rama nga LDK-ja, Hajrulla Çeku nga LVV-ja, Uran Ismaili nga PDK-ja, Bekë Berisha nga AAK-ja dhe Besa Shahini nga PSD-ja do të përballen për postin e të parit të Prishtinës në zgjedhjet lokale të 12 tetorit.
