Gazetari gjerman Michael Martens ka njoftuar se ka realizuar një intervistë me ish-presidentin e Kosovës, Hashim Thaçi, e cila ende nuk është publikuar.
Lajmin e ka bërë të ditur përmes një bashkëbisedimi në komente në platformën X.
Në njoftimin e tij, Martens përmend edhe kryeministrin në detyrë, Albin Kurti, presidenten Vjosa Osmani, si dhe presidentin amerikan Donald Trump, por pa dhënë më shumë detaje.
Gazetari gjerman edhe më herët ka folur për gjykimin në Hagë ndaj ish-krerëve të UÇK-së.
“Gjyqi i fundit i madh për krime lufte në Ballkan po i afrohet fundit. Argumentet përmbyllëse në çështjen kundër ish-udhëheqësit të guerilëve (dhe më vonë president i Kosovës së pavarur), Hashim Thaçi, janë paraparë të mbahen më 9–13 shkurt 2026. Cilido qoftë aktgjykimi, ai do të prekë edhe NATO-n”, kishte shkruar Martens.
Martens së fundmi ka kritikuar ashpër presidenten e Kosovës, Vjosa Osmani, duke thënë se ajo “nuk duket e vetëdijshme për dallimin mes përfaqësimit të interesave shtetërore dhe një forme ‘prostitucioni intelektual’”, në një koment të tij në rrjetin social X, lidhur me premierën e dokumentarit “Melania” në Prishtinë, e cila u mbajt nën patronazhin e Presidencës.
