“Janë larguar shumë në të kaluarën, vazhdojmë tutje”, ka thënë Hysen Durmishi, zëvendësministër në detyrë i Ministrisë së Mjedisit, Planifikimit Hapësinor dhe Infrastrukturës, për largimin e Liburn Aliut nga pozita e ministrit, ku ai është zëvendës i tij.
“Nuk është mirë me u largu kurrkush, mirëpo janë larguar shumë edhe në të kaluarën. Vetëvendosja e ka rrugën e vet, misionin e saj për zhvillimin e shoqërisë e shtetit. Vazhdojmë tutje”, ka thënë Durmishi në një prononcim për VOX Kosova.
Largimin e Aliut, njërit nga themeluesit e Lëvizjes Vetëvendosje dhe aktivistët më të rëndësishëm të saj, Durmishi e cilësoi si “zgjedhje individuale, personale e tij”.
“Unë jam takuar javën e kaluar dhe nuk kam pasur asnjë informacion as indikacion deri në momentin kur e kam pa publikimin në Facebook”, deklaroi ai.
Në reagimin e tij, ku njoftoi dorëheqjen, Aliu nuk tregoi nëse është larguar edhe nga VV-ja, apo vetëm nga drejtimi i Ministrisë. Këtë tha se nuk e di as Durmishi.
