Kuvendi i Kosovës mblidhet sërish sot, në një tentativë tjetër për të zgjedhur Kryetarin e Kuvendit. Të dielën, Vetëvendosje propozoi tre emra: Hekuran Muratin, Arbërie Nagavcin dhe Dimal Bashën. Asnjëri nga ta nuk i mori votat.
Partia Demokratike e Kosovës, ani pse kishte thënë se nuk kishte votë vetëm për kandidatët që janë edhe ministra, të dielën abstenoi.
Por, në një deklarim të djeshëm për VOX Kosova, sekretarja e PDK-së, Vlora Çitaku, tha se nuk kanë votë kundër kandidatit Basha.
“Ne, ashtu siç ishim dakorduar në grupin parlamentar, kërkuam pak pauzë; jo pse kishim votë kundër apo pse do ta refuzonim një propozim të tillë, por thjesht donim të siguroheshim që Lëvizja Vetëvendosje e ka seriozisht kandidimin e zotit Dimal Basha”, tha Çitaku.
Me zgjedhjen e kryetarit, në procedurë do të vendosej në pako edhe zgjedhja e nënkryetarëve.
Me konstituimin e Kuvendit, do t’i hapej rrugë formimit të Qeverisë së re, për të cilën Albin Kurti, kreu i VV-së, ka thënë se i kanë votat.
