Ambasada e Gjermanisë në Kosovë ka lëshuar një njoftim të mërkurën, përmes të cilit u është drejtuar kandidatëve për kryeministër dhe kandidatëve për deputetë për t’ia rikujtuar se organizimi i tubimeve elektorale në shtetin gjerman nuk lejohet në më pak se tre muaj para zgjedhjeve.
Ky rikujtim i ambasadës gjermane vjen kur kanë mbetur edhe 18 ditë nga mbajtja e zgjedhjeve të jashtëzakonshme parlamentare në Kosovë.
“Meqenëse kemi një diasporë të madhe të Kosovës në Gjermani, dëshirojmë t’u kujtojmë të gjithë kandidatëve se, si rregull, ngjarjet e fushatës zgjedhore nga zyrtarët e huaj në Gjermani nuk lejohen në periudhën më pak se 3 muaj para zgjedhjeve. Faleminderit për mirëkuptimin tuaj”, thuhet në njoftimin e ambasadës.
Sipas këtij njoftimi, në një nga vendet ku ka më së shumti diasporë shqiptare, nuk do të ketë tubime.
