Një gazetar i njohur i Al Jazeera-s, i cili më herët ishte kërcënuar nga Izraeli, është vrarë bashkë me katër kolegë gjatë një sulmi izraelit të dielën, sulm që është dënuar nga gazetarë dhe grupe për të drejtat e njeriut.
Ushtria izraelite ka deklaruar se ka shënjestruar dhe vrarë Anas Al Sharif, duke e akuzuar se ai drejtonte një grup të Hamasit dhe ishte i përfshirë në sulme raketore kundër Izraelit.
Al Sharif, 28-vjeçar, ishte pjesë e një grupi prej katër gazetarësh të Al Jazeera-s dhe një asistenti, të cilët humbën jetën në një sulm ndaj një tende në afërsi të Spitalit Shifa, në lindje të qytetit të Gazës, sipas zyrtarëve të Gazës dhe Al Jazeera-s. Një zyrtar i spitalit ka thënë se edhe dy persona të tjerë janë vrarë gjatë sulmit.
Duke iu drejtuar Al Sharifit si “një nga gazetarët më trima në Gaza”, Al Jazeera ka deklaruar se sulmi ishte një “përpjekje për të shuar zërat që kundërshtojnë okupimin e Gazës”.
