Ministrja në detyrë e Industrisë, Ndërmarrësisë dhe Tregtisë, Rozeta Hajdari, nuk është përgjigjur kur është pyetur nga VOX Kosova se pse nuk ka marrë pjesë në seancën gjyqësore për rastin e rezervave shtetërore.
“Kalo mirë”, tha shkurtimisht Hajdari kur u pyet nga VOX-i teksa dilte nga objekti i MINT-it të mërkurën në mesditë.
Paraprakisht, Hajdari ka reaguar në lidhje me mungesën e saj në seancën e parë në rastin e rezervave shtetërore, duke thënë se nuk ka marrë thirrje nga gjykata.
“Për seancën e sotme gjyqësore, lidhur me çështjen e rezervave shtetërore të mallrave, ju njoftoj se, unë nuk kam pranuar ndonjë thirrje për seancë nga ana e Gjykatës!”, shkroi ajo në Facebook.
Hajdari, e cila tani është kandidate për deputete nga radhët e Vetëvendosjes, dy zyrtarët e ministrisë – Irfan Lipovica dhe Hafiz Gara – si dhe një biznesmen i afërt me pushtetin, Ridvan Muharremi, i njohur si Ridi, akuzohen se i kanë shkaktuar dëm buxhetit të shtetit rreth 3 milionë euro.
Kur aktakuza iu ngrit nga Prokuroria, Hajdari doli e foli duke akuzuar me emra prokurorët se kanë bërë gjoja përndjekje politike ndaj saj. Ajo edhe i akuzoi se kanë shkelur ligjet për sekret shtetëror.
