Në leximin e saj të aktgjykimit të Gjykatës Kushtetuese për bllokadën në Kuvend, Presidentja e Kosovës, Vjosa Osmani, ka thënë se votimi i fshehtë lejohet, por se duhet të ketë konsensus në mes të deputetëve për këtë procedurë të votimit.
“Konstatimi i ekipit tim ligjor me të cilin unë pajtohem është që në qoftë se lexohet në tërësi aktgjykimi votimi i fshehtë nuk përjashtohet si mundësi, megjithatë për të kërkohet konsensusi i deputetëve”, tha Osmani para gazetarëve të premten.
Megjithatë, ajo ka theksuar se nëse Kuvendi nuk konstituohet brenda afatit të vendosur nga Gjykata Kushtetuese, do të ketë “pasoja juridike”.
“Unë do të planifikoj që në qoftë se nuk ka konstituim të Kuvendit shumë shpejt që t’i drejtohem Gjykatës me kërkesë për sqarim në lidhje me atë se çfarë pas 30 ditësh”, shtoi.
Vendimi i Kushtetueses – i publikuar më 26 qershor – ndonëse i njëjtë për të gjithë, u interpretua ndryshe nga partia në pushtet, e ndryshe nga opozita. Të gjitha palët pretenduan se Kushtetuesja u dha të drejtë qëndrimeve të tyre.
Kundërshtime pati sa i përket procesit të votimit të fshehtë, i iniciuar nga VV. Pushteti thekson se Kushtetuesja nuk e shpalli anti-kushtetues këtë proces, derisa opozita vlerëson se e shpalli anti-kushtetues.
Që nga mbajtja e seancës së parë konstituive më 15 prill, janë mbajtur 41 seanca për këtë proces, mirëpo pavarësisht kësaj partitë politike nuk kanë arritur të zgjedhin kreun e legjislativit.
Osmani të mërkurën dhe të enjten ka zhvilluar konsulta me partitë politike për bllokadën në Kuvend.
