Koordinatorja nacionale e zgjedhjeve nga Prokuroria e Shtetit, Laura Pula, në një intervistë për VOX Kosova ka thënë se ka dyshime se komisionerët e të gjitha partive janë përfshirë në vjedhje të votave në Prizren.
“Hetimet do të shkojnë deri në fazën e fundit, me qëllim që të zbulohet se si komisionerët kanë hequr ose kanë shtuar vota për kandidatë të caktuar. Si pasojë, disa mund ta humbin mandatin e deputetit, ndërsa disa të tjerë mund të përfshihen në listat përfundimtare për deputetë”, tha Pula.
Prokurorja theksoi se është ende herët për të konstatuar nëse kemi të bëjmë me një skemë të organizuar nga të gjitha partitë politike.
“Nuk mund të thuhet ende se si ka qenë e organizuar, por dihet se përfaqësuesit që kanë qenë në numërimin e votave i përkasin të gjitha subjekteve politike, katër më të mëdhatë, sipas rregulloreve të KQZ-së. Prandaj, pasi të përfundojë i gjithë procesi i rinumërimit dhe të dalim me rezultate dhe hetime konkrete, atëherë do të shqyrtohet si e mundshme çdo lloj skeme e përgatitur paraprakisht”.
“Një dukuri e tillë ka qenë evidente edhe në vitin 2010, kur ka pasur vjedhje brenda subjekteve politike, e ashtuquajtura ‘vjedhje brenda llojit’. Pra, përderisa nuk preken votat e subjekteve politike, por vetëm votat e kandidatëve për deputetë, atëherë është cenuar vullneti i lirë i qytetarëve për të kredituar deputetin për të cilin kanë votuar”.
