Policia e Kosovës ka zbuluar sërish pajisje dhe veshje ushtarake në Veri. Sipas njoftimit, mëngjesin e së enjtes (18 shtator 2025), rreth orës 09:45, njësia e hetimeve e Stacionit Policor në Zveçan ka gjetur në një rimorkio të braktisur, dy thasë me uniforma, municion dhe pajisje tjera ushtarake.
Gjatë kontrollit janë konfiskuar: një uniformë ushtarake kamufluese, pesë karikatorë me 132 fishekë të armës AK-47, pesë fatrolla për mbajtje të karikatorëve në gjoks, katër palë pantallona dhe katër jakne ushtarake, tre fotrolla për radiolidhje, një antiplumb, dy rripa brezi ushtarak, një jelek taktik, një çantë taktike, një helmetë e gjelbër, një kapelë dhe një dritë rrotative.
Në vendin e ngjarjes kanë dalë njësitë relevante policore, ndërsa rasti është proceduar në Prokurorinë e Shtetit, e cila ka urdhëruar inicimin e hetimeve për veprën penale “Mbajtja në pronësi, kontroll ose posedim i paautorizuar i armëve”.
Për këtë rast nuk është arrestuar asnjë person. Policia dyshon se këto armë i përkasin një të dyshuari, i cili është në kërkim për rastin Banjska – sulmin terrorist të 24 shtatorit 2023.
