Gjykata Kushtetuese e Republikës së Kosovës i ka vendosur masë të përkohshme deri më 31 mars, Dekretit të Presidentes Vjosa Osmani për shpërndarjen e Kuvendit të Kosovës. Vendimi është marrë pas kërkesës së Qeverisë e cila ka kontestuar kushtetutshmërinë e dekretit të kryetares së shtetit.

Sipas shkresave të lëndës të cilat janë publikuar në vendim, Qeveria e Kosovës, si parashtrues i kërkesës ka theksuar se “në këto rrethana ekziston një rrezik real dhe i menjëhershëm që, përpara se Gjykata Kushtetuese të vendosë mbi themelin e kësaj çështjeje, të krijohen pasoja faktike dhe institucionale të cilat do të ishin jashtëzakonisht të vështira për t’u korrigjuar në rast se më vonë konstatohet se akti i kontestuar nuk është në përputhje me Kushtetutën”.

“Fillimi i procedurave për organizimin e zgjedhjeve të jashtëzakonshme do të përfshinte një sërë veprimesh institucionale dhe administrative, duke filluar nga caktimi i datës së zgjedhjeve, aktivizimi i procedurave zgjedhore, mobilizimi i administratës zgjedhore, Komisionit Qendror të Zgjedhjeve (KQZ) dhe angazhimi i burimeve publike, të cilat, pasi të jenë ndërmarrë, do të krijonin një gjendje faktike që do të ishte tejet e vështirë të rikthehej në gjendjen e mëparshme kushtetuese”, ka theksuar Qeveria e Kosovës në kërkesën e saj.

Gjykata, për të arritur në verdiktin e saj, është bazuar në paragrafët 1 dhe 2 të rregullit 44 të Rregullorës së Punës të cilët flasin për kërkesën për masë të përkohshme dhe të cilët thonë:

1. Në çfarëdo kohe, përderisa Gjykata të mos ketë vendosur lidhur me një kërkesë, çdo palë mund të kërkojë vendosjen e masës se përkohshme lidhur me çështjen që është objekt i procedurës para saj, siç përcaktohet me nenin 27 (Masat e përkohshme) të Ligjit.

2. Gjykata po ashtu mund të vendosë masë të përkohshme ex-officio, lidhur me një çështje që është objekt i procedurës para saj, nëse konsideron se janë plotësuar kushtet për një gjë të tillë sipas neni 27 te Ligjit.

Masa do të jetë në fuqi deri më 31 mars 2026.

VENDIMI I PLOTË.