Mediat ndërkombëtare po i kushtojnë vëmendje të shtuar procesit gjyqësor ndaj ish-krerëve të Ushtrisë Çlirimtare të Kosovës, në një fazë kur gjykimi në Hagë po i afrohet përfundimit.
Raportim të veçantë i ka kushtuar edhe transmetuesi publik gjerman, Deutsche Welle, e cila në një video shpjeguese thekson se verdikti në këtë proces “do të ndikojë jo vetëm në Kosovë, por në të gjithë Ballkanin, Evropën dhe komunitetin ndërkombëtar”.
DW sjell në fokus rrugëtimin politik të Hashim Thaçit, nga roli i tij në UÇK deri në postin e Presidentit të Kosovës, si dhe ndikimin që mund të ketë vendimi përfundimtar i Gjykatës Speciale për të dhe të tjerët.
Aty, ndër të tjera, përmenden edhe protestat e mbajtura në Prishtinë, Tiranë dhe Shkup kundër Dhomave të Specializuara të Kosovës, ku mijëra shqiptarë nga të gjitha trojet shprehën mbështetjen e tyre për ish-krerët e UÇK-së.
Procesi i gjykimit ndaj ish-krerëve të UÇK-së ka hyrë në fazën finale. Nga 9 shkurti deri më 18 shkurt do të dëgjohen fjalët përfundimtare të palëve, ndërsa pas kësaj, trupi gjykues ka 90 ditë kohë të tërhiqet për vendimin përfundimtar.
Që nga 5 nëntori i 2020-së, në qendrën e paraburgimit në Hagë ndodhen katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të akuzuar nga Dhomat e Specializuara për krime të pretenduara lufte dhe kundër njerëzimit.
