Djali i liderit suprem të vrarë, Ajatollah Ali Khamenei, është kandidati kryesor për ta pasuar të atin si Lideri i ardhshëm Suprem i Republikës Islamike, raportoi të martën The New York Times.
Raporti thotë se klerikët e lartë të ngarkuar me zgjedhjen e liderit të ri suprem mund ta shpallin vendimin e tyre që të mërkurën në mëngjes.
Duke cituar zyrtarë iranianë të njohur me diskutimet, raporti thekson se klerikët kanë disa rezerva për shpalljen e Mojtaba Khameneit si lider suprem, nga frika se kjo mund të rrisë gjasat që ai të bëhet objektiv i SHBA-së dhe Izraelit.
Sipas raportit, klerikët zhvilluan dy takime virtuale mbi këtë çështje të martën.
Raporti i Times erdhi pasi media opozitare Iran International pretendoi se Mojtaba Khamenei tashmë është zgjedhur nga Asambleja e Ekspertëve si pasardhës i të atit, duke cituar “burime të informuara”.
Izraeli tha të martën se ka hedhur në erë ndërtesën e Asamblesë së Ekspertëve, organi prej 88 anëtarësh që ka për detyrë zgjedhjen e liderit të ri suprem, dhe se po pret informacione mbi rezultatet e sulmit. Një raport i mediave iraniane tha se ndërtesa në Qom ishte bosh kur ushtria izraelite njoftoi se e kishte goditur.

Ndërkohë, presidenti amerikan Donald Trump hodhi poshtë të martën idenë që princi i kurorës në mërgim, djali i shahut të fundit të Iranit, të jetë pasardhës i mundshëm i Khameneit, i cili u vra në një sulm izraelit në Teheran të shtunën. Ai argumentoi se “dikush nga brenda” Iranit mund të ishte më i përshtatshëm.
Duke folur para gazetarëve në Zyrën Ovale, Trump tha se shumë zyrtarë iranianë që administrata e tij i kishte konsideruar si liderë të mundshëm të rinj janë vrarë në fushatën amerikano-izraelite.
Trump nuk ka identifikuar publikisht ndonjë person që e konsideron lider të besueshëm të ardhshëm për Iranin dhe mbetet e paqartë nëse Shtëpia e Bardhë ka pasur kontakte me zyrtarë iranianë që nga fillimi i luftës.
“Shumica e njerëzve që kishim në mendje janë të vdekur,” tha ai. “Tani kemi një grup tjetër, ata mund të jenë gjithashtu të vdekur, sipas raporteve. Pra, po vjen një valë e tretë. Së shpejti, nuk do të njohim askënd.”
Trump tha se Reza Pahlavi, djali i ish-shahut, nuk është dikush që administrata e tij e ka shqyrtuar thellësisht për të marrë drejtimin e Iranit.
“Më duket se dikush nga brenda, ndoshta, do të ishte më i përshtatshëm,” tha Trump, duke shtuar se mund të ketë kuptim që “dikush që është aty, që aktualisht është popullor, nëse ekziston një person i tillë”, të dalë nga vakumi i pushtetit.
Komentet e Trump erdhën teksa ai priti kancelarin gjerman Friedrich Merz për takimin e tij të parë ballë për ballë me një lider të huaj që nga nisja e luftës kundër Iranit.
Trump tha se dëshiron të shmangë një “skenar më të keq” ku “dikush merr pushtetin dhe është po aq i keq sa personi i mëparshëm”.
Shtëpia e Bardhë ka intensifikuar përpjekjet për t’iu kundërvënë kritikave se veproi shumë shpejt për të nisur një luftë të zgjedhur kundër Iranit.
Vendimi i Trump për të goditur javën e kaluar pasoi negociata të gjata të dërguarit të tij Steve Witkoff dhe dhëndrit Jared Kushner me iranianët, bisedime që SHBA i shihte gjithnjë e më shumë si përpjekje për të zvarritur progresin.
Pas raundit të fundit të diskutimeve në Gjenevë, Witkoff dhe Kushner i thanë Trump se ishte e mundur të arrihej një marrëveshje bërthamore e ngjashme me atë që Barack Obama arriti në vitin 2015, por se do të kërkonte muaj të tërë.









