11 persona janë dërguar në Spitalin Universitar të Traumës në Shqipëri (SUT), për të marrë ndihmë mjekësore si pasojë e lëndimeve që kanë marrë në protestën e së premtes, e cila është duke vazhduar ende.
Siç raportojnë mediat në Tiranë, në bazë të përditësimeve të bëra në ora 18:45, mes të lënduarve janë 6 protestues, prej të cilëve 3 janë të mitur.
3 të lënduar të tjerë janë efektivë policie dhe 2 kalimtarë.
Në urgjencën e SUT, siç raportojnë mediat në Shqipëri, aktualisht ndodhen 2 protestues dhe një efektiv policie.
Të tre thuhet se janë në gjendje të mirë shëndetësore dhe po vijojnë ekzaminimet mjekësore.
Protesta e studentëve të Shqipërisë nisi të martën në Tiranë. Gjatë ditëve në vijim, ajo u shtri edhe në qytete të tjera.
Studentë dhe gjimnazistë kanë dalur për të protestuar edhe në Durrës, Korçë, Shkodër, Elbasan e qytete të tjera.
Mediat në Shqipëri raportojnë për një sërë incidentesh, me theks të veçantë për forcën joproporcionale që Policia shqiptare po e përdor ndaj protestuesve.
Raportohet për grupe policësh civilë të maskuar, të cilët mbajnë në duar shkopinj dhe nuk kanë shenja të dukshme identifikimi.
Pamjet të cilat qarkullojnë në rrjete sociale, tregojnë se si policia i kap të rinjtë, i godet ata me shkopinj gome dhe në disa raste i tërheq zvarrë.
Kërkesa kryesore e protestuesve është dorëheqja e Kryeministrit Edi Rama, të cilën, në një përgjigje për Reuters, ai tha se nuk do jap.
“Sa u përket thirrjeve për dorëheqjen time, qeveritë ndërrohen përmes zgjedhjeve demokratike. Ne patëm zgjedhje vitin e kaluar, jo revolucion”, tha Rama të enjten në përgjigjet me shkrim për pyetjet e Reuters.
Protestuesit kanë sulmuar disa institucione, si Ministrinë e Drejtësisë e atë të Ekonomisë, por edhe disa prona private në Tiranë.
Policia përdori gaz lotsjellës, sprej për sy e topa uji për të shpërndarë protestuesit.
Si pasojë e protestave, seanca e Kuvendit shqiptar e paraparë për të enjten u anulua.
Studentët janë duke protestuar kundër rritjes së kostove të arsimit dhe kundër korrupsionit qeveritar. Por, kërkesa kryesore e tyre është dorëheqja e Ramës.
Rama ka theksuar se do të ishte i gatshëm të diskutonte për rritjen e kostove të arsimit, por pohoi se “sulmet ndaj institucioneve, shkatërrimi i pronës publike dhe rrezikimi i sigurisë publike nuk kanë të bëjnë fare me kërkesat legjitime të studentëve”.
Protestat e dhunshme të studentëve vijnë pas disa muajsh demonstratash paqësore, të cilët kundërshtonin ndërtimin e një resorti luksoz në bregdetin jugor të Shqipërisë nga Jared Kushner, dhëndri i Presidentit të Shteteve të Bashkuara të Amerikës, Donald Trump.
Protestat në Shqipëri janë pjesë e një vale të aktivizmit studentor në Evropë.
Në Francë, nxënësit e shkollave të mesme kanë organizuar protesta që kanë zgjatur me javë të tëra dhe kanë bllokuar shkollat, duke kërkuar më shumë mësimdhënës dhe kushte më të mira.
Ata argumentojnë se përkeqësimi i gjendjes së ndërtesave shkollore dhe mbingarkesa e klasave po dëmtojnë arsimin.









