Pas protestave kundër Gjykatës Speciale e në mbrojtje të ish krerëve të UÇK-së në Prishtinë, Tiranë, Hagë e Strasburg, sot, më 13 dhjetor, shqiptarët do të mblidhen për protestën e radhës në kryeqytetin e Maqedonisë së Veriut, në Shkup.
Protesta është thirrur në ora 13:00.
Organizatorët e protestës nuk kanë arritur të sigurojnë garanci për ish ushtarët e Ushtrisë Çlirimtare të Kosovës, të cilët mund të jenë subjekt i ndonjë arrestimi nga autoritetet maqedonase, si pasojë e prezencës së tyre në listat e Interpol-it që nga koha e luftës.
Qëllimi kryesor i protestës mbetet i njëjtë; thirrje për drejtësi në procesin ndaj ish presidentit Hashim Thaçi, Kadri Veselit, Rexhep Selimit e Jakup Krasniqit.
Organizimi i sotëm në Shkup ka marrë mbështetje nga Ali Ahmeti, kryetar i Bashkimit Demokratik për Integrim si dhe tifo-grupi shqiptar Shvercerat që vepron në Shkup. Protesta ka marrë mbështetje edhe nga Prishtina. Kryetari i Prishtinës, Përparim Rama, u bëri thirrje shqiptarëve që të bashkohen në Shkup.
