Personi i dytë nga e majta në fotografi, me një bluzë të verdhë e me një buzëqeshje në fytyrë është biznesmeni Ylber Shamolli. Ky shfaqet në një aktivitet krah për krah me kryeministrin në detyrë, Albin Kurtin e ministrin e Kulturës po ashtu në detyrë, Hajrulla Çekun. Udhët e Shamollit dhe pushtetit kryqëzohen tek tenderët njëburimorë që kompania e tij, “Eurokos Holding SH.P.K” ka fituar së fundmi.
3 milionë euro është shuma që shteti i pagoi përmes tenderit kompanisë “Eurokos Holding SH.P.K” për ndërtimin e dy urave që lidhin jugun me veriun e Mitrovicës. Më 1 korrik, Ministria e Infrastrukturës shpërbleu me kontratë këtë kompani përmes procedurës së negociuar pa publikim të njoftimit të kontratës. Gjithësej u pranuan pesë aplikime, por vetëm ai nga “Eurokos Holding SH.P.K”, u konsiderua i përgjegjshëm duke u shpallur kështu fitues.
DOKUMENT:
Para gjashtë ditësh, “Eurokos Holding SH.P.K”, fitoi edhe një tjetër tender. Përmes procedurës së njëjtë, me ministrinë e njëjtë, në vendin e njëjtë, por veç me punë ndryshe. Firma e Shamollit kësaj radhe do të duhet të ndërtojë rrugën që lidhë urën e re me rrugën kryesore në Mitrovicë, në jug e veri.
Vlera totale e kontratës së re është 479 mijë e 999 euro.
DOKUMENT:
Në një bisedë me VOX Kosova, pronari i “Eurokos Holding”, Ylber Shamolli, thotë se fotografia me Albin Kurtin e Hajrulla Çekun ishte rastësore.
“Unë jam kanë ma shumë se 10 vjet nënkryetar dhe anëtar i bordit të Federatës së Tenisit. U kanë inaugurimi i fushave të tenisit në Taukbahçe që i ka financu ministria edhe Komuna e Prishtinës. Qata është edhe nënkryetari i komunës e kryetari i Federatës. Janë krejt edhe unë si nënkryetar kam marrë pjesë në inaugurim të fushave. Ajo ka qenë fotografi e rastësishme bile më kanë thirrë ti po e sheh qysh kam dalë unë veç krytë aty se më kanë thirrë hajde, hajde, hajde”, thotë Shamolli.
Ai thotë se kompania e tij “është e para që ka shtruar rrugë në Kosovë dhe se fokusin e ka në Shqipëri”.
Për kontratat njëburimore, mohon se u favorizua.
“Kurrfarë favorizimi s’ka. Unë dy kontrata i kam që pesë vjet. Ma shumë punoj në Shqipëri se që punoj në Kosovë. E vetmja kontratë njëburimore është qikjo e urave, edhe aty na kanë marrë si referencë se urat në Shqipëri shumicën e autostradës e kemi pas dhe e kena kry na. E kanë ditë që kemi referenca edhe kena përvojë në ura. Kjo ka qenë një burimore se kjo realisht, fillimisht ka qenë e paraparë veç ura si urë. Domethënë procesi i projektimit u vonu edhe tani kanë shpejtu. Kjo ka qenë me prioritet nacional. Me thanë se nuk më ka interesu. Po masi më kanë thirrë e kam kry punën teme”, potencon Shamolli.
Kontrata njëburimore mes kompanisë së Shamollit dhe Ministrisë së Infrastrukturës tanimë është subjekt hetimi nga Prokuroria Speciale e Republikës së Kosovës.
“Në mbrojtje të interesit publik dhe sundimit të ligjit, në mënyrë që të garantohet një administrim i drejtë dhe ligjor i resurseve publike”, theksonte organi më i lartë akuzues në komunikatë për media teksa konfirmonte nisjen e veprimeve hetimore për projektin në fjalë.
