Nënkryetari i Lëvizjes Vetëvendosje, Glauk Konjufca, së bashku me deputetin e Partisë Demokratike të Kosovës, Mërgim Lushtaku, kanë marrë pjesë bashkë në një tubim elektoral në Graçanicë të hënën, në përkrahje të kandidatit shqiptar për Kryetar të kësaj komune, Leotrim Ajeti.
Nga pamjet që ka publikuar Ajeti, Konjufca dhe Lushtaku duken në humor të mirë, derisa qëndrojnë të ulur krah kandidatit për Kryetar.
Për pjesëmarrjen e tyre në tubim, Ajeti ka falënderuar Konjufcën dhe Lushtakun.
“Në këtë tubim, ku na nderuan edhe Glauk Konjufca dhe Mërgim Lushtaku, salla u mbush përplot qytetarë, të rinj, familjarë dhe përfaqësues nga të gjitha lagjet të bashkuar për të treguar se shpresa për ndryshim po rritet çdo ditë”, shkroi Ajeti në Facebook.
Në Graçanicë, për herë të parë partitë shqiptare janë bërë bashkë duke garuar me një kandidat të përbashkët.
