207 mijë euro është shuma që Gjykata Speciale kishte obliguar Salih Mustafën të paguante si formë kompensimi ndaj tetë viktimave në rastin e tij.
Vendimi i prillit të 2023-ës është modifikuar në atë formë që “Cali” tani do të duhet të paguajë më shumë se aq.
Në një verdikt të ri të marrë në Hagë të cilin e ka parë Vox Kosova, bëhet me dije se ish-komandoja e njësitit BIA të UÇK-së këto para do t’i paguajë me normë interesi.
Për një vit vonesë, norma e interesit do të jetë 8%.
“Salih Mustafa nuk i ka përmbushur detyrimet e tij sipas Urdhrit të Dëmshpërblimit; informohet Salih Mustafa se një normë interesi prej tetë përqind (8%) në vit do të fillojë të llogaritet për pjesën e Urdhrit të Dëmshpërblimit që ende nuk është ekzekutuar që nga data në të cilën i njoftohet ky vendim; dhe urdhëron Regjistruesin që t’i paraqesë Gjyqtarit të Vetëm, duke filluar një (1) vit nga data kur ky vendim i njoftohet Salih Mustafës dhe çdo vit më pas në të njëjtën datë, në mënyrë konfidenciale nëse është e nevojshme, një raport vjetor që tregon, për secilën viktimë, (i) shumën e mbetur që duhet paguar nga Salih Mustafa”, thuhet në vendimin e gjyqtarit të vetëm në Hagë.
Për të arritur në këto konkludime, Gjykata Speciale kishte komunikuar me Ministrinë e Drejtësisë në Kosovë.
Nga kjo e fundit ishte kërkuar shpjegim mbi praktikat gjyqësore që përdoren në Kosovë në rastet kur i dënuari duhet të paguajë dëmshpërblim.
“Së pari, në lidhje me normën e interesit që do të aplikohet në rastet e dhënies së dëmshpërblimeve për dëmet bazuar në një dënim penal të formës së prerë, Ministria e Drejtësisë e Kosovës pohon se: (i) ky aspekt nuk ishte i rregulluar nga Ligji i vitit 1978 për Marrëdhëniet Detyruese, por se gjykatat e Kosovës kishin vendosur për një normë interesi për vonesën në pagesë e cila u aplikua nga bankat e Kosovës për fondet pa një destinacion specifik të depozituara për një afat prej një viti, nga dita e lëshimit të vendimit të gjykatës deri në pagesën e plotë; dhe (ii) që nga hyrja në fuqi e Ligjit të Kosovës për Marrëdhëniet Detyruese më 20 dhjetor 2012, norma e interesit u vendos në tetë përqind (8%) në vit”, tha Ministria në përgjigjen e saj për Specialen.
Sqarimi i dhënë nga MD nuk i pëlqeu gjyqtarit vendimtar që megjithatë më pas mori vendim sipas praktikës që aplikohet në Kosovë.
Në aktgjykimin e parë të Speciales, Mustafa ishte dënuar me 26 vjet heqje lirie.
Apeli e më pas Supremja kishin ulur dënimin në 22 dhe përfundimisht në 15 vjet burg.
