Pas raportimeve nga disa media se Washingtoni ka kuptuar se Putin është i gatshëm të bëjë kompromis në kërkesat e tij territoriale, zëvendës-zëdhënësi i Ministrisë së Punëve të Jashtme të Rusisë, Alexei Fadeev, është pyetur nga gazetarët nëse qëndrimi i Rusisë ka ndryshuar apo jo.
Ai ka thënë se qëndrimi i autoriteteve ruse për përfundimin e luftës në Ukrainë nuk ka ndryshuar që prej kohës kur presidenti Vladimir Putin i ka vendosur kushtet e tij vitin e kaluar: largimi i plotë i forcave të Kievit nga rajone të rëndësishme të Ukrainës dhe heqja dorë nga ambicia e tyre për anëtarësim në NATO.
Putin dhe presidenti amerikan, Donald Trump, do të takohen të premten në Alaska, në kuadër të samitit të parë SHBA–Rusi që nga viti 2021, për të diskutuar përpjekjet për përfundimin e luftës. Trump ka thënë se të dyja palët do të duhet të shkëmbejnë pak tokë që kanë nën kontroll, në mënyrë që kjo të jetë e arritshme.
Aktualisht, Rusia kontrollon 19% të territorit të Ukrainës, përfshirë Krimenë, të gjithë Luhanskun, më shumë se 70% të Donetskut, si dhe rajonet e Zaporizhzhias dhe Khersonit, ndër të tjera.
