Takimi mes Putinit dhe Trump-it u përmbyll me një konferencë të përbashkët për shtyp. Takimi, që po quhet historik, nisi me pritjen zyrtare që Presidenti amerikan, Donald Trump, i bëri Presidentit rus, Vladimir Putin, në pistën e bazës në Alaska. Ata më pas udhëtuan bashkë për në takim me veturën e njejtë, mbajtën takimin dhe përmbyllen atë me konferencën, që në media të huaja po cilësohet si një PR i suksesshëm për Presidentin Putin.
Presidentët nuk dhanë shumë detaje nga takimi, por u la të kuptohet se nuk është arritur një zgjidhje për paqe. Pra, lufta në Ukrainë do të vazhdojë.
Konferenca nisi me fjalën e Putinit — një thyerje e traditës protokollare, sipas së cilës zakonisht fjala i jepet fillimisht presidentit amerikan.
Të dy liderët e lavdëruan njëri-tjetrin dhe thanë se kishin zhvilluar një diskutim shumë pozitiv. Asnjëri prej tyre nuk pranoi të merrte pyetje pas konferencës, duke e lënë të paqartë përmbajtjen e plotë të bisedës.
Megjithatë, Putini tha se ishte pajtuar me Trump-in për nevojën e arritjes së sigurisë së Ukrainës. Nga ana e tij, Trump theksoi se “nuk ka marrëveshje derisa të ketë një marrëveshje” dhe shtoi se do të telefononte figura relevante për t’i informuar mbi takimin e se pret një takim shumë shpejt mes Putinit, Presidentit ukrainas, Zelensky, e ndonjë lideri evropian.
Në fund, Putini iu drejtua Trump-it në anglisht: “Next time in Moscow” (herën tjetër në Moskë), ndërsa ky i fundit iu përgjigj duke thënë se “mund ta shoh duke ndodhur.”
