Australia do ta njohë shtetin e Palestinës në Asamblenë e Përgjithshme të OKB-së në shtator, duke ndjekur lëvizje të ngjashme me ato të Britanisë, Francës dhe Kanadasë, ka njoftuar kryeministri i Australisë, Anthony Albanese.
Albanese ka thënë se Australia ka marrë zotime nga Autoriteti Palestinez për demilitarizim, mbajtjen e zgjedhjeve të përgjithshme dhe vazhdimin e njohjes së së drejtës së Izraelit për ekzistencë.
“Zgjidhja me dy shtete është shpresa më e madhe e njerëzimit për të thyer ciklin e dhunës në Lindjen e Mesme dhe për t’i dhënë fund konfliktit, dhimbjes dhe urisë në Gaza,” ka thënë ai të hënën.
Izraeli, nën presion në rritje për të përfunduar luftën në Gaza, ka thënë se njohja e shtetit të Palestinës “shpërblen terrorizmin.”
