Presidenti amerikan, Donald Trump, do ta mirëpresë sot në Shtëpinë e Bardhë kryeministrin izraelit, Benjamin Netanyahu, ndërsa do të mundohet që të shtyjë para një propozim paqeje në Gaza pas njohjes së shtetësisë së Palestinës nga disa liderë perëndimorë në Asamblenë e Përgjithshme të Kombeve të Bashkuara.
Vizita e katërt e Netanyahut me Trump që nga ardhja e këtij të fundit në pushtet në janar të këtij viti do të karakterizohet me përpjekje nga kryeministri izraelit për të shfrytëzuar aleatin më të fuqishëm të vendit të tij, ndërsa po përballet me izolim në rritje ndërkombëtar gati dy vjet nga fillimi i luftës kundër Hamasit në Rripin e Gazës.
Netanyahu dha një fjalim të ashpër në Asamblenë e Përgjithshme kundër vendimit të Britanisë, Francës, Kanadasë, Australisë e shumë vendeve të tjera për njohjen e shtetit të Palestinës, duke e quajtur “vendim mosmirënjohës”.
Trump, i cili po ashtu kritikoi njohjet duke i quajtur si trofe për Hamasin, ka thënë për Reuters se ai shpreson që ta bindë Netanyahun për një kornizë që do të hapë një kapitull të ri drejt përfundimit të luftës dhe lirimit të të gjitha pengjeve të luftës të mbajtura nga Hamasi.
