Dimal Basha, kryeparlamentari i Kosovës. Paramendojeni, Kryeparlamentari. Qëndrimet e tij se UÇK-ja na paska qenë një grumbull i trafikantëve të drogës të botuara në formë të një artikulli në anglisht, po na i shitë si pakujdesi e çastit.
Shihni çfarë ka thënë.
Kush është ai budallë, në çfarë përmase të idiotësisë funksionon ai njeri, i cili lejon emrin e tij si autor në një punim publik, por vetë artikullin nuk e paska lexuar kurrë.
Paramendojeni situatën. Jeni studentë, ju vjen shansi për të publikuar artikull shkencor. Artikulli publikohet me emrin tuaj e ju nuk e lexoni artikullin.
More i pafytyrë, po për çfarë na mendon ti ne? A kaq të padijshëm e supozon ti qytetarin e Kosovës a?
Po qe hajt ta zëmë nuk e paske lexuar artikullin. Po bashkautoren me të cilën e ke shkruar a e njihje? A e dije se ajo kishte edhe një libër komplet me teza të tilla? Ku e njohe ti atë? Ku të njohu ajo bash ty? Pse të ftojë ajo pikërisht ty?
I pafytyrë.
Për më tepër, të dashur qytetarë, veç shkurt. Në vitin 1978 në Vankuvër të Kanadasë janë mbledhur studiues të shumtë dhe kanë vendosur një rregull nga i cili nuk dilet kur merr pjesë në punime shkencore. Rregulli, apo deklarata e Vankuverit thotë se autorët duhet të deklarojnë qartë kontributin e tyre, por përgjegjësia është kolektive.
Pra, Dimal Basha jo vetëm që e ka lexuar, jo vetëm që është autor i tekstit, por ai zyrtarisht ka pranuar të marrë përgjegjësi të plotë për këtë tekst skëterrë kundër UÇK-së e në linjë të plotë me politikën serbe.
Po ky nuk ka faj. Ose faj ka, po s’është fajtori kryesor ky. Është Albin Kurti që na e solli në krye të Kuvendit, sepse derisa në opozitë Kurti bënte politikë serioze, ai në pushtet ka promovuar cinizëm dhe kandidimi i Dimal Bashës është kurorëzim i kësaj kulture cinike e cila në thelb ka për qëllim rrënimin e integritetit të institucioneve të qëndrueshme të shtetit duke i devalvu moralisht në perceptimin publik dhe duke i bërë efektivisht të pavlefshme ato.
Ky është një mesazh i orkestruar nga Albin Kurti, që si projekt ka shkrirje të institucioneve të shtetit në instrumente të nënshtruara të partisë sepse ato pushtohen vetëm pasi paraprakisht devalvohen. E devalvimi vjen me njerëz si Dimal Basha.
Fatkeqësisht, pjesë e kësaj orkestre u bë edhe Partia Demokratike e Kosovës me votën pro Bashës. Sepse, PDK u bënë bashkëpjesëmarrës në një projekt thellësisht autokratik i mbështjellë me vellon e cirkuzit karnevalesk, por jashtëzakonisht të dëmshëm.
Sot Dimal Basha është autor i cituar nga studentët e Beogradit kur duan të dëshmojnë tregimin serb për Kosovën përmes një shqiptari.
Fatkeqësisht, sot me gojën plotë diplomacia serbe del nëpër botë e thotë: çfarë mendojmë ne për Kosovën është saktësisht e njëjta çfarë mendon Kryeparlamentari i Kosovës për shtetin e vet.
