Hajrullah Çeku e dënoi dje sulmin ndaj Fehmi Kupinës, Kryesuesit të Asamblesë së Prishtinës, që u raportua se i erdhi nga një asamblist i LDK-së.
Por Ministri i Kulturës, Rinisë dhe Sportit, njëkohësisht kandidat i Vetëvendosjes për Prishtinë, ka krejt tjetër standard ndaj njerëzve të tij të afërt që denoncohen për dhunë: i emëron në pozita të larta.
Në maj të këtij viti, ai ka emëruar si Ushtrues Detyre të Drejtorit të Ansamblit “Shota” Xheladin Krasniqin.
Krasniqi kishte qenë Ushtrues Detyre i Sekretarit të MKRS-së dhe në nëntor të vitit 2024 e kishte kërcënuar e sulmuar fizikisht Miftar Latifin, U.d. i Udhëheqësit të Divizionit të Teknologjisë së Informacionit dhe Shërbimeve Logjistike në MKRS.
Ngjarja kishte ndodhur në zyrën e Krasniqit dhe, sipas rrëfimeve të Miftar Latifit, Krasniqi ishte ngritur në këmbë, i ishte afruar në fytyrë duke i thënë: “t’mys”, e më pas e kishte kapur nga palltoja. Këtë rrëfim e kishte pranuar pak a shumë edhe vetë Krasniqi.
Rasti ishte denoncuar edhe në polici.
Krejt kjo ngjarje nuk i kishte bërë shumë përshtypje Çekut.
Xheladin Krasniqi ishte emëruar në pozitën e Ushtruesit të Detyrës së Sekretarit nga pozita e zyrtarit të prokurimit.
Pas rastit të kanosjes ndaj zyrtarit Latifi dhe reagimeve të shumta të zyrtarëve të ministrisë, Krasniqi ishte dërguar nga pozita e Sekretarit në atë të Inspektorit të Trashëgimisë Kulturore.
Por nuk qëndroi shumë atje dhe një pozitë e lartë i erdhi në maj të këtij viti.
Ministri Hajrullah Çeku e ka emëruar si Ushtrues Detyre të Drejtorit të Ansamblit “Shota” – institucion kulturor nën vartësinë e MKRS-së.
Xheladin Krasniqi, sa ishte Ushtrues Detyre i Sekretarit, kishte tentuar të rehatohej si Drejtor i Zyrës për të Drejtat e Autorit në MKRS.
E gjithë kjo kishte ndodhur me një procedurë të shpejtë.
Konkursi ishte shpallur më 30 maj 2024 dhe ishte mbyllur më 30 qershor 2024.
Për vetëm 8 ditë ishte emëruar komisioni vlerësues, ishte bërë verifikimi paraprak, më 03.07.2024 ishte mbajtur testimi me shkrim, më 05.07.2024 intervistimi dhe më 8 korrik Krasniqi ishte shpallur fitues.
Agjencia për Parandalimin e Korrupsionit e kishte vlerësuar si konflikt interesi zgjedhjen e tij, dhe e gjithë procedura ishte anuluar edhe nga Këshilli i Pavarur Mbikëqyrës për Shërbimin Civil të Kosovës./VoxKosova
