Ish-ministri i Ekonomisë, Ethem Çeku, ka kritikuar mënyrën se si është menaxhuar liberalizimi i tregut të energjisë në Kosovë, duke e quajtur proces “të nxituar” dhe që “dëmton” bizneset e ekonominë.
Përmes një postimi në Facebook, Çeku ka thënë se në Kosovë, energjia është shndërruar “në instrument politik të qeverive të radhës”, për dallim nga vendet e Bashkimit Evropian që e kanë konsideruar si “politikë kombëtare” e lidhur ngushtë me zhvillimin ekonomik.
“Kosova… ndërmori hapin e liberalizimit për kompanitë e mëdha pa siguruar më parë kapacitete të reja prodhuese. Ky vendim e ka detyruar sektorin privat të lidhet me furnizues të jashtëm, duke i ekspozuar bizneset ndaj luhatjeve të tregjeve ndërkombëtare dhe duke rritur ndjeshëm kostot e tyre”, shkroi ai.
Ajo që e veçon Kosovën nga shumica e vendeve të tjera, në prizmin e tij, është “politizimi ekstrem i sektorit energjetik”.
Prandaj, Çeku konsideron se liberalizimi i tregut “në kushte të tilla nuk ka qenë hap drejt zhvillimit, por hap drejt dobësimit të mëtejshëm ekonomik dhe rritjes së pasigurisë energjetike”.
