Drejtori i Përgjithshëm i Policisë së Kosovës, Gazmend Hoxha, ka thënë se ditëve të fundit ka pasur fluturime të dronëve që vijnë nga Serbia në pjesën Veriore të Kosovës. Ai ka theksuar se për këtë është njoftuar edhe misioni paqeruajtës i NATO-s në Kosovë, KFOR.
“Gjatë ditëve të fundit kemi pasur fluturime të dronëve që ne po dyshojmë që vijnë nga territori i Serbisë, në pjesën Veriore të Kosovës”, tha Hoxha para gazetarëve.
Ai theksoi se policia është në kontakt me KFOR-in dhe “jemi duke e bërë monitorimin se çfarë mund të bëhet”.
“Është e rrezikshme për pjesën e kufirit, por për qytetarët tanë në jug, ne jemi duke i mbrojtur gjithashtu”, shtoi.
Hoxha potencoi se hapësira ajrore është përgjegjësi e KFOR-it. “Ne e kemi njoftuar KFOR-in dhe partnerët tanë. KFOR-i, është përgjegjësi e tyre dhe janë duke punuar në këtë drejtim”, pohoi.
