Kryetari i Lidhjes Demokratike të Kosovës, Lumir Abdixhiku, ka deklaruar se LDK-ja nuk do të japë votën për asnjë kandidat për kryetar të Kuvendit pa një marrëveshje politike paraprake.
Duke komentuar seancën e sotme, ku u propozuan Hekuran Murati, Arbërie Nagavci dhe në fund Dimal Basha, Abdixhiku ka shkruar se “ky është niveli i tyre”.
“Pse po habiteni? Ky edhe është niveli i tyre. Kjo është derexheja në të cilën kemi rënë si vend. Këta janë njerëzit me të cilët pretendojnë të udhëheqin këtë shtet. Ju përçmojnë – prandaj dhe me përçmim ju përfaqësojnë.”
Ai theksoi se LDK-ja ka mbajtur një qëndrim të qëndrueshëm dhe parimor për situatën politike në vend, që nga dita pas zgjedhjeve.
“Qëndrimet e LDK-së janë parimore dhe konsistente që nga dita e parë. Për këtë arsye qëndrojmë mbi lojërat patetike politike. Pa marrëveshje nuk mund të ketë shumicë. Pa marrëveshje nuk mund të ketë votë – për askënd dhe asnjërin!
Marrëveshje uniteti kemi ofruar – nuk e deshën. Tani le ta bartin përgjegjësinë për bllokimin. Jemi të bindur, sidoqoftë, se duke sharë e ofenduar në vazhdimësi, nuk do të ndryshojnë mendimin e askujt.”
Nga radhët e LDK-së, vetëm deputeti Arbën Gashi votoi pro kandidaturës së Dimal Bashës – një votë që, siç e arsyetoi vetë, e kishte premtuar më herët ndaj deputetit të VV-së, nëse ai do të kandidohej për këtë post.
