Prapa Fitore Pacollit të Vetëvendosjes e në mes të politikanëve të tjerë kosovarë në takimin sekret në Solothurnit të Zvicrës ishte edhe ministri serb i Integrimeve Evropiane, Nemanja Staroviç.
I njëjti, i përket Partisë Progresiste, të presidentit të Serbisë, Aleksander Vuçiç.
Ndër vite, dikur si Sekretar i Ministrisë së Jashtme në Beograd, e më pas edhe si pjesë direkte e kabinetit qeveritar, ishte fuqishëm aktiv në fushatën e egër serbe kundër Kosovës.
Staroviç është mohues i Masakrës së Reçakut. Në një deklaratë të dhënë në vitin 2023, ai thoshte se viktimat civile të ngjarjes së 15 janarit të 1999-ës, që tronditi opinionin ndërkombëtar, “kanë qenë njerëz të armatosur, dhe se nuk bëhet fjalë për ekzekutime nga forcat serbe”.
I përbetuar t’a dëmtojë Kosovën në arenën ndërkombëtare, Staroviç është në angazhim aktiv në propagandën dhe lobimin serb për çnjohjet e Pavarësisë.
Pesë ditë pas sulmit në Banjska e një muaj e gjysmë para se të takohej me Mimoza Kusarin, Fitore Pacollin e të tjerët – sulmin terrorist në veri, ai e quante “krim” por nga ana e shqiptarëve kundër serbëve, duke iu referuar terroristëve të vrarë nga Policia e Kosovës.
Dy pjesëmarrëset nga pushteti në takimin me Staroviçin, Mimoza Kusari Lila dhe Fitore Pacolli, thanë se mbrojtën qëndrimin e Qeverisë së Kosovës aty. Ndryshe, nga siç thotë dokumenti i siguruar nga VOX Kosova me konkluzionet nga takimi, i cili thotë se pjesëmarrësit ishin të pajtimit se Njësitë Speciale mund të tërhiqen nga veriu.
“Kishte marrëveshje që njësitë speciale mund të tërhiqen kur situata e sigurisë të stabilizohej, por kishte mosmarrëveshje për kohën e tërheqjes”, thuhet në dokument.
E përderisa fliteshin këto çështje të ndjeshme – në pauzat mes diskutimesh, në sheshin e qytetit ku po ndodhte gjithçka, relaksoheshin në shëtitje Mimoza Kusari Lila dhe politikanja ekstremiste serbe, Sanda Rashkoviç Iviç.
