Albulena Haxhiu, kandidate e Lëvizjes Vetëvendosje për Kryetare të Kuvendit, ka thënë se nëse nuk i merr 61 vota në votim të fshehtë, do të tërhiqet nga kandidatura si kryeligjvënëse.
Gjykata Kushtetuese e Kosovës ka shpallur të enjten aktgjykimin në lidhje me konstituimin e kuvendit, ku dha afat 30 ditë që ky proces të përfundojë. Ndonëse opozita dhe njohës të çështjeve kushtetuese theksuan se vendimi i Kushtetueses nuk e lejon votimin e fshehtë, Haxhiu ka insistuar që zgjedhja e saj të bëhet nëpërmjet votimit të fshehtë, duke pretenduar se ky proces nuk është anti-kushtetues.
“Me rastin e votimit të fshehtë, kur votojnë të gjithë deputetët e Kuvendit, ashtu siç ka kërkuar Gjykata Kushtetuese, ashtu siç ka obliguar gjykata, nëse unë si kandidate e propozuar nga VV-ja nuk i marrë së paku 61 vota, tërhiqem nga kandidatura”, deklaroi ajo në një konferencë për media të premten.
Ndryshe, sot mbahet seanca e 38-të për konstituimin e Kuvendit të Kosovës. Përfaqësues të partive opozitare – PDK, LDK e AAK – po e fajësojnë VV-në për bllokadën e krijuar tash e disa muaj pas zgjedhjeve parlamentare të 9 shkurtit.
Pas shpalljes së aktgjykimit të Kushtueses, kryetari i VV-së, Albin Kurti, i ka ftuar në një takim të gjithë partitë që janë pjesë e parlamentit, në funksion të konsensusit për konstituimin e Kuvendit.
Aktualisht palët nuk po tërhiqen nga qëndrimet e tyre: VV nuk largohet nga kandidatura e Haxhiut, ndërsa opozita e ka bërë të qartë se s’do ta përkrahin Ministren në detyrë të Drejtësisë.
