Faruk Mujka, anëtar i Lëvizjes Vetëvendosje dhe Kryeshef Ekzekutiv i Bordit të Ndërmarrjes Hidroekonomike “Ibër-Lepenci”, ka thënë se nuk do të jap dorëheqje pas ngritjes së aktakuzës ndaj tij nga Prokuroria Speciale.
“Pse duhem të jap? A ka ndonjë vendim rreth asaj aktakuze?”, tha Mujka pasi që u pyet nga VOX Kosova. “Po e kam shqyrtuar [dorëheqjen], po nuk e shoh të arsyeshme”, shtoi.
Mujka, i cili është edhe Kryeshef Ekzekutiv i Bordit të Ndërmarrjes Hidroekonomike “Ibër-Lepenci”, sipas Prokurorisë, akuzohet për veprat penale të “Keqpërdorimit të pozitës zyrtare” dhe “Mosraportimit ose raportimit të rremë të pasurisë, të ardhurave, dhuratave, dobisë materiale ose detyrimeve financiare”. Akuzat lidhen me kohën kur ai ka shërbyer si nënkryetar i komunës së Mitrovicës.
Organi i akuzës bëri të ditur se Mujka së bashku me Hysen Muzliukaj, ish-këshilltar i Faton Pecit, dyshohen se i kanë shkaktuar Agjencisë Kosovare të Privatizimit (AKP) dëm mbi 125 mijë euro.
