Drejtuesit e vendeve të Ballkanit Perëndimor dhe përfaqësues të Bashkimit Evropian do të marrin pjesë të hënën në Samitin e Brdo-Brionit, i cili do të mbahet në qytetin bregdetar të Durrësit, nën patronazhin e Presidentit të Shqipërisë, Bajram Begaj.
Ky samit pritet të sjellë diskutime për integrimin e Ballkanit Perëndimor në BE dhe mënyrat për ta përshpejtuar këtë proces. Plani i Rritjes për rajonin pritet të jetë temë kryesore.
Aty raportohet të jenë pjesëmarrës Presidentja e Kosovës, Vjosa Osmani, Presidentja e Sllovenisë, Natash Pirc Musar, Presidenti i Kroacisë, Zoran Millanoviç, Presidenti i Malit të Zi, Jakov Millatoviç, Presidentja e Maqedonisë së Veriut, Gordana Siljanovska-Davkova, si dhe Presidenti i Serbisë, Aleksandër Vuçiç.
Në Tivat të Malit të Zi, vitin e kaluar, tema e këtij samiti ishte rreth përmirësimit të bashkëpunimit midis vendeve të Ballkanit Perëndimor dhe anëtarëve të Bashkimit Evropian.
Procesi Brdo-Brioni është një nismë e përbashkët slloveno-kroate, e nisur në vitin 2010, e cila synon forcimin e besimit dhe ndihmës për vendet e Ballkanit Perëndimor në rrugën drejt BE-së.
