Liderët e vendeve të Ballkanit Perëndimor do të mblidhen këtë të hëne në qytetin bregdetar të Shqipërisë, në Durrës, për Samitin e Brdo-Brionit, i cili synon të nxisë bashkëpunimin rajonal dhe t`i lehtësojë përpjekjet e vendeve të rajonit në rrugën e tyre drejt Bashkimit Evropian.
Tema e këtij Samiti do të jetë: “Interesa të përbashkëta, angazhim i përbashkët për një të ardhme të përbashkët: Së bashku drejt BE-së”. Takimi i këtij viti do të fokusohet në perspektivën evropiane të vendeve të Ballkanit Perëndimor dhe në forcimin e bashkëpunimit rajonal, me fokus në Planin e Rritjes së Rajonit të propozuar nga Bashkimi Evropian.
Në këtë Samit që do të mbahet nën patronazhin e Presidentit të Shqipërisë, Bajram Begaj, si nikoqir i tij, Kosova do të përfaqësohet nga Presidentja Vjosa Osmani.
Përveç Osmanit, pritet që të marrin pjesë edhe Presidentja e Sllovenisë, Natash Pirc Musar, Presidenti i Kroacisë, Zoran Millanoviç, Presidenti i Malit të Zi, Jakov Millatoviç, Presidentja e Maqedonisë së Veriut, Gordana Siljanovska-Davkova, si dhe Presidenti i Serbisë, Aleksandër Vuçiç.
Vitin e kaluar kjo iniciativë ishte mbajtur në Tivat të Malit të Zi. Tema ishte rreth përmirësimit të bashkëpunimit midis vendeve të Ballkanit Perëndimor dhe anëtarëve të Bashkimit Evropian.
Samiti i Brdo-Brionit është një iniciativë e përbashkët slloveno-kroate, e nisur në vitin 2010, e cila synon forcimin e besimit dhe ndihmës për vendet e Ballkanit Perëndimor në rrugën drejt BE-së.
