Kompania “Management & Development Associates” ka marrë sot licencën nga ZRRE-ja për furnizim e tregtim me shumicë të rrymës. “MDA sh.p.k” është firmë e themeluar nga Luan Dalipi, shef i kabinetit i kryeministrit në detyrë, Albin Kurti.
Vendimi është marrë sot në mbledhjen e bordit të Zyrës së Rregullatorit për Energji.
“Më 10.07.2025, Bordi i Zyrës së Rregullatorit për energji ka mbajtur seancën e tetë (VIII) për vitin 2025. Në këtë seancë Bordi ka shqyrtuar dhe aprovuar aplikacionet për licencim të aktivitetit për furnizim me shumicë (tregtim) të energjisë elektrike të “Energy Kosova V.B” sh.p.k dhe “Management & Development Associates” sh.p.k”, tha ZRRE sot në një komunikatë për media.
Kompania në fjalë aktualisht është në pronësi të vëllaut të Luan Dalipit por që ky i fundit figuronte si themelues i saj. Licenca për MDA-në vjen në një kohë kur sektori i energjisë është përfshirë në skandale madhore korruptive.
Noa Energy Trade, kompani me adresë e numër fiktiv është ndër kryesoret në këtë skandal. Pa zyre e pa adresë valide, me dy punëtorë të deklaruar, “Noa Energy Trade” parashihet që deri në fund të vitit të ketë 357 milionë euro qarkullim. Vitin e kaluar ajo ishte kompania e tetë me qarkullimin më të madh në Kosovë, gjithësej 161 milionë euro.
