Prokuroria Speciale e Kosovës në bashkëpunim me Policinë e Kosovës, njoftoi se ka bastisur të hënën objektin e Kompanisë Rajonale të Ujësjellësit “Gjakova” dhe shtëpinë e Kryeshefit Ekzekutiv të kësaj kompanie, Hasan Krasniqi, i cili ka histori angazhimi në Lëvizjen Vetëvendosje.
Krasniqi e ka nisur rrugëtimin politik në partinë “Alternativa”, ku shërbeu si asamblist në Kuvendin Komunal të Gjakovës gjatë mandatit të parë të Mimoza Kusari-Lilës (2014–2017), duke qenë pjesë e Komitetit për Politikë dhe Financa. Më pas ai iu bashkua Lëvizjes Vetëvendosje, ku garoi me numrin 14 në listën e kandidatëve për Asamble Komunale në zgjedhjet lokale të 2021-së.
Pasi që kishte dështuar që të zgjidhej asamblist, Krasniqi ishte emëruar kryeshef në KRU ”Gjakova”, më 26 janar të vitit 2022.
Shtëpia e tij dhe objekti i KRU Gjakova, u bastisën këtë të hënë, ku u sekuestruan dokumente që pritet të shërbejnë si prova në procedurë penale.
Sipas komunikatës së Prokurorisë, hetimet lidhen me disa vepra penale, duke përfshirë “keqpërdorimin e pozitës apo autoritetit zyrtar”, “falsifikimin e dokumentit zyrtar”, “shmangie nga pagesa e tarifave doganore ose akcizore”, “konflikt interesi” dhe “mashtrim në prokurimin publik”.
Por, ky nuk është problemi i vetëm që Krasniqi e ka me ligjin.
Edhe në shkurt të vitit 2024 ai ishte arrestuar në Bullgari, pasi që kishte një urdhërarrest ndërkombëtar të lëshuar nga institucionet italiane. Krasniqi dyshohej për trafikim me qenie njerëzore.
