1 prilli ishte data kur ishte planifikuar e caktuar që kundër krerëve të UÇK-së të paraqitej dëshmitari i 126 i prokurorisë me kodin W04747.
Sidoqoftë ai nuk erdhi në Speciale andaj ZPS kërkoi që deklaratat e tij të mëhershme të pranohen si prova në rast.
Por një gjë e tillë nuk guxon të ndodh sipas Rodney Dixon, avokat i Kadri Veselit në proces.
Një ankesë që ai e çoi në gjykatë për këtë dëshmitar, ka përmbajtje shqetësuese.
Aty, Dixon ka argumentuar se dëshmitari në fjalë ka gënjyer vazhdimisht, ka sajuar dhe ka ekzagjeruar ngjarje.
“Provat janë të papranueshme sipas Rregullës 138 për shkak të mosbesueshmërisë së tyre. W04747 nuk është një dëshmitar i vërtetë. Ai është i paqëndrueshëm, pretendimet e tij janë të pakonfirmuara dhe rrëfimi i tij është padyshim i pavërtetë”, thuhet ndër të tjera në shkresën e Dixon.
Ekipi i Kadri Veselit në Hagë ka thënë se ka kryer hetime mbi këtë dëshmitar dhe atë që ai thotë, dhe ka dalë në tri përfundime që çojnë në të njëjtin drejtim.
“Provat e mbledhura nga Mbrojtja bien në kundërshtim të drejtpërdrejtë me W04747 dhe tregojnë se W04747 e ka ekzagjeruar rëndë, ka një histori të demonstrueshme gënjeshtrash dhe ekzagjerimesh dhe ka gënjyer për shumë ngjarje të përshkruara në intervistë”, thotë Dixon.
Si shtyllë mbështetëse ekipi i ish-kryekuvendarit ka bashkëngjitur prova të qarta dhe direkte që dëshmojnë pasinqeritetin e këtij personi.
“Mbrojtja nuk mban barrën e të provuarit se W04747 është gënjeshtar. Prokuroria Speciale mban barrën e të provuarit se ai është i sinqertë”, tha Dixon, duke shtuar se në rast se ky dëshmitari do përballej me pyetjet e tij, do ta kishte të lehtë ta vlerësonte se sa labil është ai.
Edhe më dyshues është fakti se ky dëshmitar, përmes intervenimit të një ‘shteti të tretë’ do të mund të dëshmonte drejtpërdrejtë përmes video-lidhjes, mirëpo që prokuroria nuk insistoi në një gjë të tillë.
Akuzat e këtij dëshmitari në drejtim të të akuzuarve sipas avokatit janë “sensacionale” dhe nuk mbështeten nga asnjë dëshmi tjetër e dhënë paraprakisht apo ndonjë provë relevante.
Në këtë situatë, mbrojtësi nga Britania i Veselit ka kërkuar që dëshmitë e dhëna nga “W04747” të hidhen poshtë.
Vendimi pritet të merret së shpejti nga Trupi Gjykues.
