Hysni Gucati, Kryetar i OVL-UÇK-së, ka rrëfyer dy raste se si Hashim Thaçi dhe Kadri Veseli, ishin përplasur me gardianët e qendrës së paraburgimit në Hagë, për shkak të trajtimit që i bëhej Salih Mustafës.
“Ka qenë një problem kur Salih Mustafën e kanë izoluar prej neve. Komandant Calin e kanë largu prej neve dikund 9 muaj, 10 muaj. Dhe në ditët e para pas atij largimi ata kanë dashtë të na i mbyllin dritaret me foli të zezë”, tregoi Gucati në një deklaratë për VOX Kosova.
Ai rrëfen tutje se Veseli “nuk i lejoi”. “Aty ka qenë një fërkim i vogël, jo fërkim diçka me thanë e shtyrë, por me gjuhë verbale”, shtoi.
“Kadriu iu thotë jo, ky është skandal. Është turp çfarë po bëni. Kadriu është bërë shkak edhe dhoma e ditës ku kemi qëndruar ne, aty dritaret s’janë mbyllë. Dhomat e gjumit po. Të gjitha i kanë mbyllë me folie të zezë, për shkak se mos me pa na Calin dhe Cali mos me na pa neve:, rrëfen ai.
Rasti tjetër është ai i Hashim Thaçit. Në një moment kur Salih Mustafa ishte i sëmurë prej dhëmbëve, dhe nuk iu dha trajtimi i duhur, kishte ndërhyrë ish-Presidenti.
“Salih Mustafa ka qenë i sëmurë prej dhëmbëve, ka qenë ditë e premte, e shtunë edhe në perëndim injeksione nuk ka, ata japin zakonisht tableta, dhe Salih Mustafës iu aj shumë dhëmbi edhe aty ka ndërhy edhe Presidenti”, tregon Gucati.
“Edhe kur vjen mjeku të hënën në mëngjes kah ora nëntë, Thaçi thotë: gjithçka mund të jesh ti, vetëm mjek s’je. Edhe aty ka qenë njëfarë gjuhë kështu e ashpër ndaj tyre, Presidenti që e ka bërë, që iu ka thënë ju jeni duke i shkelë të gjitha të drejtat tona. Kjo ka qenë shumë e vërtetë”, potencoi ai.
Të enjten, u bë publike një dëshmi e Hashim Thaçit, i cili ka thënë se ish-gardiani dhe tani prokuror i Speciales, John Devaney, kishte kërcënuar fizikisht të paraburgosurit.
