Procesi i rinumërimit në disa prej komunave të Kosovës për kandidatë për deputet ka dalë me dallim të thellë nga numërimi fillestar i votave për zgjedhjet e parakohshme parlamentare të 28 dhjetorit.
Kur janë numëruar 262 nga gjithsej 914 vendvotime që do të rinumërohen, diferenca ka shkuar në gati 15 mijë vota.
Rreth 9 mijë vota janë hequr e mbi 3 mijë janë shtuar për kandidatë të partive të ndryshme.
Eugen Cakolli nga Instituti Demokratik i Kosovës ka thënë se dallimi më i madh vrehet tek Partia Demokratike e Kosovës dhe Lëvizja Vetëvendosje.
“Rinumërimi i pjesshëm i votave të kandidatëve ka rikonfirmuar keqpërdorimet serioze nëpër qendrat komunale të numërimit. Sipas të dhënave nga rinumërimi i deridjeshëm, në nivel kumulativ, ndryshimet në votat e kandidatëve arrijnë në gati 15 mijë vota. Sipas partive, më së shumti ndryshime ka lista e PDK-së me ~7,719 vota dallim; pasuar nga LVV me ~2,947 vota dallim; LDK – me ~1,676 vota dallim; si dhe AAK me ~639 vota dallim”, ka shkruar Cakolli.
Cakolli ka vlerësuar se ky është një dallim substancial dhe se rinumërimi i plotë është zgjedhja e duhur në këtë pikë.
“Këto janë dallime substanciale, sidomos meqë shfaqen në një kontekst ku rinumërimi është duke u zhvilluar për vetëm 1/3 e vendvotimeve në nivel vendi. Për më keq, vërehet që votat e këtyre kandidatëve janë ndryshuar kryesisht nga qendrat komunale prej nga vijnë këta kandidatë. Nëse ky trend do të vazhdojë proporcionalisht, volumi i dallimeve në nivel vendi bëhet edhe më domethënës, duke ndikuar potencialisht edhe renditjet e shumë prej kandidatëve. Prandaj, rinumërimi i plotë është zgjidhja e duhur – sa më parë që të jetë e mundur, para se të ndikohen afatet tjera kushtetuese”, ka shkruar ai.
Kujtojmë se KQZ-ja ka vendosur për rinumërimin e votave të zgjedhjeve të dhjetorit për kandidatë për deputet në të gjitha komunat e Kosovës. Në 10 prej tyre është vendosur për rinumërim të plotë, ndërkaq në 28 të tjera për vetëm 10%.
