Mijëra fermerë nuk i kanë marrë subvencionet nga Ministria e Bujqësisë, Pylltarisë dhe Zhvillimit Rural, edhe pse procesi është mbyllur prej muajsh.
VOX Kosova merr vesh se bëhet fjalë për mbi 10 mijë fermerë të cilët, ndonëse janë shpallur fitues, nuk i kanë marrë ende subvencionet e tyre dhe nuk kanë një afat të caktuar se kur do t’i marrin ato.
Pakënaqësia e fermerëve tashmë është shpërfaqur hapur edhe online.
Faqja zyrtare e Ministrisë së Bujqësisë në Facebook është vërshuar me komente të qytetarëve, të cilët shprehin frustrimin e tyre që nuk u janë ekzekutuar mjetet financiare, derisa kërkojnë që të njëjtat të alokohen sa më parë në llogaritë e tyre.
Se nuk ua kanë dhënë paratë fermerëve, e ka pranuar edhe Agjencia për Zhvillimin e Bujqësisë.
Në një përgjigje për VOX Kosova, ata kanë thënë se një pjese të fermerëve u janë kryer pagesat, ndërsa theksojnë që pjesës tjetër do t’u ekzekutohen ditëve në vijim – pa dhënë afat kohor të saktë se kur.
“Duke u bazuar në informacionet e deritanishme nga Drejtoria e Pagesave dhe Drejtoria për Buxhet dhe Financa, janë ekzekutuar mjetet për një numër të madh të fermerëve, si dhe pjesës së mbetur të fermerëve që nuk iu kryer pagesa, pritet që t’iu ekzekutohen ditëve në vijim”, kanë thënë nga kjo agjenci.
Sipas tyre, një pjesë e fermerëve nuk kanë mundur ende të marrin pagesat “për shkak të procedurave shtesë administrative, çka ka ndikuar në vonesën e përfundimit të tyre”.
VOX Kosova ka kërkuar informacion edhe mbi numrin e fermerëve që ende nuk kanë marrë subvencionet dhe për vlerën, por nga kjo agjenci kanë refuzuar që të përgjigjen.
