Ish-kryetarja e gjykatës supreme të Nepalit, Sushila Karki, pritet të emërohet si kryeministrja e përkohshme e shtetit, një burim i afërt me bisedimet i ka treguar Reuters të premten, pas një proteste intensive që çoi në dorëheqjen e kryeministrit Sharma Oli.
Kryengritja më e madhe në vite në shtetin e Nepalit, që la të vdekur 34 persona këtë javë dhe lëndoi më shumë se 1,300 të tjerë ndërsa policia luftoi për të kontrolluar turmat, u nis nga një ndalim i rrjeteve sociale që tani janë kthyer prapë. Dhuna pushoi vetëm pasi Oli dha dorëheqjen.
“Sushila Karki do të emërohet si kryeministre e përkohshme”, ka thënë një ekspert kushtetues i konsultuar nga presidenti Ramchandra Paudel dhe shefi i ushtrisë Ashok Raj Sigdel, i cili kërkoi anonimitet për shkak të ndjeshmërisë së negociatave.
“Ata (Gen Z) e duan atë. Kjo do të ndodhë sot”, shtoi burimi, duke iu referuar protestuesve Gen Z emri i famshëm i të cilëve rrjedh nga mosha e shumicës së pjesëmarrësve.
Emërimi i Karki pritet të zyrtarizohet sot pas një takimi në rezidencën e Paudel, e akorduar për orën nëntë, sipas një burimi Gen Z të përfshirë në bisedimet.
Zyra e presidentit dhe zëdhënësi i ushtrisë nuk janë përgjigjur në një kërkesë të Reuters për koment mbi çështjen.
