Kryeministri i Kosovës, Albin Kurti, ka deklaruar se institucionet e Kosovës nuk kanë pasur informacione për ndonjë plan të mundshëm sulmi nga Serbia. Kjo u tha pas pretendimeve të presidentit amerikan Donald Trump se një gjë e tillë ishte planifikuar, por ishte ndalur nga Shtetet e Bashkuara të Amerikes (SHBA).
“Nuk mund t’i di planet që i kanë. Nuk i kam informacionet e tyre. Me siguri SHBA në përgjithësi kanë më shumë informacion se çfarë synimesh operacionale ka pasur Serbia dhe mund të kenë vepruar kundër tyre”, ka thënë Kurti në një intervistë televizive më 2 korrik.
I rezervuar ai tregohet dhe thirret në mungesë informacioni, duke shmangur komentet konkrete dhe duke ia lënë ato vetëm partnerëve ndërkombëtarë. Por, në deklarata të mëhershme publike, fliste ndryshe. Ai kishte përmendur rrezikun që i kanosej Kosovës nga Serbia.
“Serbia nuk po e fsheh se po kërkon rikthim në Kosovë, në esencë po kërkon luftën që e humbi”, pati thënë Kurti pas mbledhjes së Këshillit të Sigurisë Kombëtare në dhjetor të vitit 2022, duke shtuar se mohimi i shtetit dhe pavarësisë nga ana e Serbisë përbën një kërcënim të vazhdueshëm për Kosovën.
Në një paraqitje tjetër publike, ai pati edhe një paralajmërim për luftë.
“Rrezikojmë luftë. Pas Serbisë është Putini. Nuk do të thosha se rreziku është shumë i madh, por sigurisht që është i lartë. Ne jemi një demokraci që kemi një autokraci në kufij”, thoshte Kurti në një intervistë për gazetën italiane La Repubblica.
Aty ai fliste qartë për një kërcënim serioz që vinte nga Serbia dhe lidhte situatën me ndikimin rus.
Ky ndryshim mund të krijojë një orientim të paqartë të Qeverisë përballë çështjeve: siguria kombëtare dhe raportet me Serbinë.
