Kryetari i Kuvendit, Dimal Basha, mund edhe ta ketë hequr emrin nga një shkrim anti-UÇK, i realizuar bashkë me një autore maqedonase. Por ai do të përballet me kallëzim penal dhe padi civile nga një ish-ushtar i Ushtrisë Çlirimtare të Kosovës, Agim Pllashniku.
Pllashniku do të dorëzojë sot kallëzimin penal dhe padinë civile ndaj kryeparlamentarit të Kosovës përmes përfaqësuesit të tij ligjor, avokatit Gent Gjini.
Padia lidhet me pretendimet e Bashës për financimin e UÇK-së nga kartelët e drogës, si dhe për bashkëpunimin e tij me një autore për publikimin e këtyre pretendimeve në një revistë shkencore të një universiteti në SHBA.
“Ditën e premte, në Prokurorinë Speciale në orën 13:20, do të dorëzojmë kallëzimin penal dhe padinë ndaj Dimal Bashës për propagandën dhe përhapjen e fakteve të pavërteta ndaj UÇK-së. Ai ka theksuar se UÇK-ja është financuar nga kartelët e drogës, pretendime që i ka publikuar në një revistë shkencore në një universitet në SHBA. Po ashtu, fakti që Dimal Basha ka bashkëpunuar me një autore dhe ka shpërndarë të dhëna kundër UÇK-së, duke i dhënë informata asaj për këtë publikim kundër popullit shqiptar, është pjesë e padisë. Si avokat dhe përfaqësues i UÇK-së, të premten do të procedojmë kallëzimin penal, ku do të kërkojmë që gjatë hetimit të merret në tërësi revista e publikuar. Po ashtu, do të kërkojmë nga Prokuroria Speciale që Dimal Bashës t’i ndalohet ushtrimi i pozitës së kryeparlamentarit, përderisa çështja të trajtohet dhe të hetohet. Universiteti amerikan do të na sigurojë revistën shkencore, e ku do të konstatohet vepra penale e kryer nga Dimal Basha”, tha avokati Gjini.
