Në sheshin “Skënderbeu” në Shkup, nesër Organizata e Veteranëve të Luftës të Ushtrisë Çlirimtare të Kosovës organizon protestën e radhës në përkrahje të Hashim Thaçit, Kadri Veselit, Jakup Krasniqit e Rexhep Selimit që po gjykohen në Hagë nga Gjykata Speciale.
Por, Maqedonia nuk është një shtet që ish-ushtarë të UÇK-së mund të kalojnë krejt lirshëm.
Të paktën dy ish-ushtarë të UÇK-së ishin ndaluar në Maqedoninë e Veriut me fletarreste nga Serbia.
Blerim Ramadani ishte ndaluar më 17 korrik 2024 në pikëkalimin kufitar Jazhincë, bazuar në një fletarrest të lëshuar nga Gjykata e Beogradit, përmes INTERPOL Serbia, me pretendimin për krime lufte në verën e vitit 1999 në rajonin e Nerodimës. Në vitin 2016, pikërisht për shkak të fletarresti nga Serbia, ishte arrestuar në kufirin ndërmjet Kosovës dhe Maqedonisë së Veriut Gafurr Elshani.
Izet Mexhiti, kryetar i Çairit dhe njëri nga liderët e koalicionit VLEN – që është edhe pjesë e Qeverisë së Maqedonisë së Veriut – tha se problem nuk është shteti atje por INTERPOL-i.
“Nuk kanë problem me shtetin e Maqedonisë, por problemi është që në INTERPOL është Serbia dhe në INTERPOL i lëshon ato fletarreste. Nuk ka të bëjë me Maqedoninë, por drejtpërdrejt në INTERPOL i lëshon ato listat”, deklaroi ai për Vox Kosova.
I pyetur se a ka garanci që nesër secili ish-ushtar i UÇK-së të kalojë pa problem, tha se po punojnë që gjithçka të shkojë qetë.
“Jemi duke punuar me kalu qetë e mirë. Jemi duke punuar për të pasur mbarëvajtje të protestës”, tha Mexhiti.
Protestën e nesërme e ka mbështetur kryetari i Bashkimit Demokratik për Integrim, Ali Ahmeti, Partia Demokratike e Kosovës, Aleanca për Ardhmërinë e Kosovës, organizata dhe personalitete të tjera kombëtare.
Kjo protestë vjen pas asaj në Strasburg, Hagë, Tiranë dhe Prishtinë.
Procesi në Hagë kundër krerëve të UÇK-së ka përfunduar me dëgjimin e dëshmitarëve dhe në shkurt do të jepen fjalët përfundimtare të palëve.
Në maj 2026 ndërkaq pritet të shpallet vendimi i panelit.
Hashim Thaçi, Kadri Veseli, Jakup Krasniqi dhe Rexhep Selimi ndodhen në paraburgim e proces gjyqësor që nga nëntori 2020.
