Kryetari i PDK-së, Memli Krasniqi, e ka mbështetur protestën e 7 gushtit të veteranëve të UÇK-së kundër Gjykatës Speciale. Ai e quajti zvarritjen e procesit gjyqësor ndaj ish-krerëve të UÇK-së “shqetësuese” dhe “shmangie nga standardet e pritura të drejtësisë”.
“Ftoj të gjithë qytetarët që besojnë në drejtësinë e luftës sonë për liri, në dinjitetin dhe të ardhmen e Republikës së Kosovës, që t’i bashkohen kësaj proteste më 7 gusht, në orën 17:00, në sheshin ‘Skënderbeu’”, ka shkruar Krasniqi në Facebook.
Protestën e ka mbështetur edhe kryetari i AAK-së, Ramush Haradinaj, i cili i ka quajtur legjitime dhe të drejta kërkesat e veteranëve.
Kryetari i OVL-UÇK-së, Hysni Gucati, në një konferencë për media të hënën, njoftoi se protesta do të mbahet në orën 17:00 para objektit të Kuvendit të Kosovës. Ai tha se protesta është thirrur për shkak të “padrejtësive të Gjykatës Speciale”, “shkeljeve të të drejtave të të akuzuarve” dhe, siç u shpreh, “heshtjen e institucioneve të vendit”.
Që nga 5 nëntori i 2020-së, në qendrën e paraburgimit në Hagë ndodhen katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të akuzuar nga Dhomat e Specializuara për krime të pretenduara lufte dhe kundër njerëzimit.
