Organizata e Veteranëve të dalur nga Lufta e Ushtrisë Çlirimtare të Kosovës ka ftuar shqiptarët të bashkohen në protestën që do të mbahet më 13 dhjetor në Shkup të Maqedonisë së Veriut kundër Gjykatës Speciale.
Në takimin që kanë mbajtur të martën me kryetarët e degëve kanë diskutuar lidhur me përgatitjet e fundit për protestën.
“Sot, në takimin me kryetarët e degëve, u diskutua lidhur me përgatitjet e fundit për protestën e 13 dhjetorit, e cila do të mbahet në Sheshin ‘Skënderbeu’ në ora 13:00 në Shkup. Ftojmë të gjithë shqiptarët të bashkohen me ne në këtë protestë”, thuhet në njoftim.
Protesta në Shkup është e pesta me radhë që po organizohet nga OVL-UÇK, pas atyre që u mbajtën në Prishtinë, Hagë, Tiranë dhe Strasburg, ku dhjetëra mijëra shqiptarë nga të gjitha trojet protestuan kundër Speciales.
Që nga 5 nëntori i 2020-së, në qendrën e paraburgimit në Hagë ndodhen katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të akuzuar nga Dhomat e Specializuara për krime të pretenduara lufte dhe kundër njerëzimit.
