Prokuroria Speciale ka kërkuar paraburgim për serbin me inicialet S.S. i dyshuar për krime lufte ndaj popullsisë civile në Komunën e Vushtrrisë.
“Në bashkëpunim me pjesëtarë të tjerë të uniformuar duke vepruar në grup si zyrtarë të mobilizuar rezervsitë aktivë me njësi të përbëra nga Ministria e Punëve të Brendshme e Serbisë, gjatë periudhës së luftës në Kosovë ka marrë pjesë në vrasjen e civilëve të paarmatosur në Komunën e Vushtrrisë”, thuhet në komunikatën e Prokurorisë.
Përpos kësaj, ai dyshohet se më 6 prill të vitit 1999 gjatë një aksioni ka plaçkitur, djegur shtëpi, si dhe ka ushtruar dhunë fizike dhe seksuale ndaj civilëve të paarmatosur. Gjatë fazës së hetimeve njoftohet se janë siguruar prova materiale, përfshirë edhe dëshmi të dëshmitarëve.
